Tuesday, December 30, 2008

სად გავატაროთ ახალი წლის ღამე

2009 წლამდე დროის ათვლა დაიწყო. ახალ წელს როგორც შეხვდები, მთელი წელი ისე გაივლისო ნათქვამია და შესაბამისად სწორი არჩევანის გაკეთება მეტად საპასუხიმგებლო საქმეა. თბილისის რესტორნები და კლუბები ერთმანეთს ეცილებიან და მათ, ვინც ჯერ არ ჩამოყალიბებულა საახალწლო გეგმებთან დაკავშირებით, ღამის დაუვიწყარ გარემოში გატარებას ჰპირდებიან. თითოეული მათგანი განსხვავებული პროგრამით გაუმასპინძლდება სტუმრებს და თქვენი ასარჩევია რომელი იმუშავებს თქვენთვის ყველაზე კარგად. ,,I-მედია’’ თავის მხრივ შეეცდება არჩევანის გაკეთებაში დაგეხმაროთ. ანა შუბითიძის საახალწლო ღამის გზისმკვლევი მათთვის, ვისაც ჯერ არ გადაუწყვეტია სად შეხვდება ახალ წელს და ჯიბეზე ხელის გარტყმაც არ ენანებათ.

ახალ წელს თითოეული რესტორანი ცდილობს სტუმრებს განსხვავებულად, ორიგინალური პროგრამითა და მენიუთი შეხვდეს. მათი დიდი ნაწილი განტვირთვისა და გართობის მსურველებს ქართულ, ტრადიციულ სუფრასთან ეპატიჟება, ქართული მუსიკითა და ტრადიცული კერძებით. მეორე ნაწილი კი უპირატესობას კლუბურ მუსიკას ანიჭებს.

ახალი წლის ღამის რესტორანში გატარებას თუ გეგმავთ, სულ მცირე 100 ლარი მაინც უნდა გაიმეტოთ. ამ ფასად შეგიძლიათ მიაკითხოთ რესტორან ,,შობას“, სადაც სტუმრების წინაშე ადგილობრივ შემსრულებლებთან ერთად მოსკოვიდან მოწვეული მომღერლები წარსდგებიან.

რესტორან ,,მეტეხის ჩრდილში“ იმღერებენ ლიზა ბაგრატიონი, შვიდკაცა, აჩიკო ნიჟარაძე და დათუნა სირბილაძე. ბილეთის ფასი 180 ლარია. რესტორანის მენეჯერის თქმით, ,,მეტეხის ჩრდილში“ 210 კაცამდე ეტევა. ახალი წლის ღამეს საოცრებები ახასიათებს და ბილეთები 270 კაცზე გაიყიდა. შესაბამისად გასათვალიწინებელია ორი გარემოება: ჯერ ერთი შეიძლება ვინმეს კალთაში ჯდომა მოგიწიოთ. გაძეძგილ დარბაზში ხელების გაშლა და ცეკვა სავარაუდოდ გაძნელდება. მეორეც ის რომ ყველა ბილეთი გაყიდულია, მაგრამ ისევ და ისევ გვახსოვდეს რომ საახალწლო ღამემ საზღვრები არ იცის.

ყოველივე ამან სულაც არ იმოქმედა სტუდენტ ნატუკა ჩხაიძის ენთუზიაზმზე. ახალი წელი იმისაა რომ ბოლომდე გაერთოო ამბობს ნატუკა, რომელმაც ,,მეტეხის ჩრდილში’’ ბილეთები ერთი თვით ადრე და დაჯავშნა. ,,ახალი კაბა და ფეხსაცმელი შევიკერე და აბა სახლში საჩვენებლად ხომ არ ჩავიცვამ?’’ – კითხულობს ნატუკა. ,,მინდა წესიერ ადგილას წავიდე და მივდივარ კიდეც.’’

რესტორანი „Two Side” სტუმრებს შერეული ტიპის კონცერტს შესთავაზებს. იმღერებს დუეტი ,,Georgia” დავით ილურიძის ბენდთან ერთად. ასევე დაგეგმილია თეატრალური წარმოდგენა, მოგვიანებით კი საღამოს ,,dj” გაძღვება. რესტორნის ქართულ მხარეს მაგიდის დაკვეთა კაცზე 160 ლარი დაგიჯდებათ, ხოლო ევროპული მხარე შესაბამისად ევროპული ფასი – 200 ლარი ეღირება.

მსგავსი პროგრამა აქვს რესტორან ქალაქურს, თუმცა ეს უკანასკნელი ირწმუნება, რომ წელს საკუთარ დასახელებას ნამდვილად გაამართლებს. საახალწლო მაყურებლის წინაშე გამოვლენ გიო ხუციშვილი და გია კორკოტაშვილი. ბილეთის ფასი 250 ლარია.

კლუბ „City“-ში სტუმრების გახალისებას შეეცდებიან დათო გომართელი, მერაბ სეფაშვილი, ნინო ბადურაშვილი და ქრისტინე იმედაძე. თუ ბედმა გაგიღიმათ შეიძლება საღამოს სპონსორის ,,ვულე-ვუ”-ს მიერ გათამაშებული საჩუქრებიც მიიღოთ. ყოველივე ეს და სხვა მრავალი სულ რაღაც 250 ლარად.

,,ქორთიარდ მერიოტის” რესტორანში მოსახვედრადაც ამავე ოდენობის თანხაა საჭირო. თუმცა ალბათ ბილეთის ღირებულებას ყურადღებას აღარ მიაქცევთ როდესაც შეიტყობთ, რომ ,,ზარაფხანა” ნახევარკარატიან ბრილიანტის ბეჭედს გაათამაშებს. სუსტი აღნაგობის მკითხველის საყურადღებოდ: ,,ქორთიარდ მერიოტი” ამით არ შემოიფარგლა და კიდევ ერთ საინტერესო აქციას გეგმავს. თუ გსურთ სასტუმროში ნომრის აღება, მაგრამ მოხდა ისე რომ ამაზე ხელი მიგიწვდებათ, ნუ ინერვიულებთ, რადგან საახალწლო ღამეს ,,ქორთიარდ მერიოტიში” ნომრის საფასური თქვენს წონაზე იქნება დამოკიდებული. ნომრის დასაკვეთათ მისულთ აწონიანიან და კლიენტი რამდენი კილოც გამოდგება იმდენ დოლარს გადაიხდის. ჩვენ ისღა დაგვრჩენია რომ ასაწონად მისულ მამაკაცებს ვურჩიოთ შემდეგი: საახალწლო სუფრას აწონვამდე მაინცადამაინც ნუ მიეძალებით, ხოლო თუ თქვენი თანხმლები მანდილოსანი უფრო სუსტია სასწორზე ასვლამდე თავაზიანად უთხარით “მხოლოდ თქვენს შემდეგ”.

ასეთი მომხიბლავი პერსპექტივის მიუხედავად სტუდენტმა გიორგი აბულაძემ გადაწყვიტა დაიქირავოს ბინა. ცნობილი ფილმის გმირის პრინციპით “в этой гостинице я хозяин” გიორგი ანალოგიურ ფასად მთელი თვე გრიალს გეგმავს კონსპირაციულ ბინაზე.
ყოველივე ზემოთ მოცემული არასრული ჩამონათვალია იმ უამრავი ღონისძიებიდან, რომლებიც თბილისში საახალწლოდ იგეგმება. როგორც ირკვევა არჩევანის მრავალფეროვნების მიუხედავად, ბევრი თბილისელი სახალწლო ღამის გატარებას ოჯახში ან მეგობრებთან ერთად გეგმავს. მაკა შუკაკიძე ამბობს, რომ მას არ უღირს 200 ლარის ,,რამდენიმე საათში” გადაყრა და ,,სხვების პრანჭვის” ყურება. გიგა რუხაძეს მოყირჭდა რესტორნიდან რესტორანში სირბილი და ახალი წლის აღნიშვნის ორიგინალური ფორმა მოიფიქრა. “ზურგზე გადავიკიდებ ღვინის ბოცას, ჩავდებ ,,შლანგს” და ასე სმით ვისერინებ ქუჩაში”, - ამბობს გიგა. ასე რომ მათ ვინც ვერ იყო და ვერ შეადგინა საახალწლო ღამის გეგმა, შეუძლია ღამის ქალაქში გაისერნოს და გიგას ღვინოზე დაეწვიოს. მისაყოლებელი თქვენზეა.

ბედნიერ ახალ წელს!

რჩევები საახალწლო სუფრისთვის

მარი ოზაშვილი
თბილისი, 25 დეკემბერი, 2008


საახალწლო კერძების დამზადება ერთი შეხედვით ურყევი და ტრადიციული კულინარიული კანონებს საფუძველზე ხდება. თუმცა, შემოქმედებითი ლავირებისთვის სივრცე მაინც არსებობს. სწორედ ამით აიხსნება ის ნიუანსური და გემრიელი განსხვავები, რომლებიც სხვადასხვა დიასახლისების გასტრონომიულ ნამოღვაწარს ახასიათებს. ვეტერანმა მზარეულებმა თავისი კულინარიული შედევრების საიდუმლო რეცეპტები მარი ოზაშვილს გაუმხილეს.

70 წლის დიასახლისს, ქალბატონ ნათელა კუპატაძეს რვა სახის საცივის რეცეპტი ზეპირად ახსოვს. “არსებობს ინდაურის ან ქათმის საცივი, ასევე ბატის ან სხვა ფრინველის საცივი, ინდაურის ან ქათმის ჩახარშული საცივი, შემწვარი ინდაურის საცივი, ინდაურის საცივი აჭარულად, ინდაურის ან ქათმის საცივი გურულად, თევზის საცივი და ღორის თავ-ფეხის საცივიც კი.” თუმცა თავად დიასახლისი მათგან ერთს იყენებს ყველაზე ხშირად. რადგან ახალი წელი უკვე ახლოვდება და საცივის მომზადების ხელოვნების სრულად შესასწავლად დრო აღარ რჩება, სწორედ ამ ერთ-ერთი საცივის რეცეპტს გთავაზობთ. თუ გსურთ თქვენი ახლობლები სამეზობლოში განთქმული “ნათელას საფირმო საცივით” გააოცოთ, აუცილებლად მისდიეთ ამ მითითებებს.


ინგრიდიენტები:
ქათამი ან ინდაური (სასურველია იყოს ცხიმიანი)ხახვი_300გრამი
ნიგოზი_500გრამი
ბულიონი_8ჩაის ჭიქა
მიხაკ-დარიჩინი, ქინძი, ნიორი, წიწაკა, ყვითელი ყვავილი, ძმარი, მარილი_ყოველივე ეს გემოვნებით.

მომზადების წესი:
გარეცხილ-გასუფთავებული ქათამი ან ინდაური მოათავსეთ ქვაბში, დაასხით წყალი და ნახევრად მოხარშეთ. შემდეგ, ამოიღეთ წვენიდან, მოაყარეთ მარილი და მოათავსეთ აირღუმელში შესაწვავად. წვნიანისთვის პიკანტური გემოს მისაცემადBბულიონს მოხადეთ ცხიმი და ამ ცხიმში მოშუშეთ გატარებული ხახვი. ნიგოზი, ნიორი, ქინძი, წიწაკა, მარილი, ყვითელი ყვავილი, მიხაკი, დარიჩინი კარგად დანაყეთ, დაამატეთ ძმარი, გახსენით ბულიონში და დაასხით მოშუშულ ხახვს. აირღუმელიდან გამოიღეთ ქათამი/ინდაური, დაჭერით და ჩააწყვეთ მომზადებულ მასაში.

რჩევა: მოგეხსენებათ, ნიგოზი საკმაოდ “ძვირი სიამოვნებაა”, თუ სურვილი გექნებათ იმისა, რომ შეამციროთ ნიგვზის რაოდენობა, შეგიძლიათ წვენს დაუმატოთ 2-3 სუფრის კოვზი სიმინდის ფქვილი წვენისათვის სისქის მისაცემად.

45 წლის ქალბატონი რუსუდან ჭკადუა საახალწლო სუფრისათვის ხაჭაპურის მისეულ რეცეპტს გვთავაზობს. მოგეხსენებათ, ხაჭაპურის ძირითადი შემადგენელი ინგრედიენტები ყველი და ცომია, მაგრამ ქალბატონი რუსუდანი, როგორც ჩანს, ახალი შესაძლებლობების ძიებაშია და გემრიელი ხაჭაპურის ერთ-ერთ მთავარ ატრიბუტად კარტოფილსაც მიიჩნევს: “მოხარშული კარტოფილი ხის კოვზით კარგად უნდა დავზილოთ. შევაზავოთ მარილითა და შავი პილპილით. მიღებულ პიურეს დავუმატოთ დაფხვნილი იმერული ყველი და ორი სუფრის კოვზი კარაქი ან ერბო. მოვზილოთ ცომი, გავაბრტყელოთ, მოვათავსოთ ზედ კარტოფილ_ყველნარევი მასა და ჩვეულებრივი წესით გამოვაცხოთ კეცზე ან ღუმელში.”



საახალწლო სუფრა წარმოუდგენელია გოზინაყის, ჩურჩხელას, ხილისა და სხვა ნუგბარის გარეშე. “იმისათვის, რომ გოზინაყი მაგარი და კნატუნა გამოვიდეს, აუცილებელია იგი ნატურალური თაფლითა და თეთრი ფერის ნიგვზით იყოს გაკეთებული”_აღნიშნავს დედოფლისწყაროს რაიონ სოფელ ოზაანში მცხოვრები 60 წლის ქალბტონი Lლეილა ფიროსმანაშვილი, რომელიც როგორც მისმა თანასოფლელებმა აღნიშნეს, საუკეთესო გოზინაყს ამზადებს. ქალბატონი ლეილას გემრიელი გოზინაყის საიდუმლო არა მის რომელიმე განსაკუთრებულ ინგრედიენტში, არამედ მომზადების დროში გახლავთ. როგორც გაირკვა, გოზინაყი განსაკუთრებულ გემოს იძენს მაშინ, თუ მის მომზადებას 30 დეკემბერს, დაახლოებით 23 საათზე დაიწყებთ. Nნიგვზისა და თაფლისაგან მომზადებული მასა ხის ფიცარზე უნდა გააბრტყელოთ, მაგრამ ეს პროცედურა აუცილებლად ღამის 12 საათამდე უნდა მოამთავროთ. გაბრტყელებული გოზინაყი გრილ ადგილას უნდა შეინახოთ, მაგრამ არა მაცივარში. Aახალი წლის ღამეს, ანუ ზუსტად 24 საათის გასვლის შემდეგ, შეგიძლიათ გოზინაყი სასურველი ფორმის ნაჭრებად დაჭრათ და გემრიელად მიირთვათ. “ნათელას საფირმო საცივს” ნამდვილად მოუხდება.

თუ გსურთ თქვენს საახალწლო სუფრაზე ნატურალური ყურძნის წვენისაგან დამზადებული გემრიელი ჩურჩხელა იდოს, მაშინ ნუ დაიზარებთ და კახეთის რაიონში, სოფელ ბადიაურს ესტუმრეთ, რომელიც თბილისიდან 30 წუთის სავალზეა. გარდა გემრიელი ჩურჩხელისა, რომლის მოზადების წესიც სამწუხაროდ ჯერჯერობით საიდუმლოდ რჩება, თქვენ აქვე შეგიძლიათ შეიძინოთ სხვადასხვა ხილის ჩირი და უამრავი საახალწლო ნუგბარი.

ფიგურის შენარჩუნების მსურველთა საყურადღებოდ: ახალი წლის ღამის შემდეგ, სარკეში ჩახედვისას თუ თქვენი თავი წონაში მომატებული მოგეჩვენათ, ნუ გაგიკვირდებათ, ყველაფერი ჩემ მიერ მოწოდებული რეცეპტების მიხედვით მომზადებულ უგემრიელეს კერძებს დააბრალეთ.

შ ე გ ე რ გ ო თ!

Monday, December 29, 2008

პარლამენტარების დასკვნა ომის შესახებ

ნაზი ბერიძე
თბილისი, 30 დეკემბერი 2008


ომის შემსწავლელმა საპარლამენტო კომისიამ დაკითხვების გასაიდუმლოებული ოქმების საჯაროდ გამჟღავნება მოითხოვა. სავარაუდოდ ეს სვლა კომისიის დასკვნას მეტ დამაჯერებლობას ვერ შემატებს პარლამენტს გარეთ დარჩენილი ოპოზიიციის თვალში, რომელიც მათ მიერ შერისხულ საკანონმდებლო ორგანოში მიმდინარე ნებისმიერ პროცესს სკეპტიკურად უყურებს.

ორთვიანი დაუღალავი შრომის ნაყოფი - 200-გვერდიანი დასკვნა, ვერ შედგა როგორც წლის ბესტელერი. ხელისუფლებამ კომისიას ნაშრომი მოუწონა, ხოლო არასაპარლამენტო ოპოზიციისგან გამანდგურებელი რეცენზია მიიღო.

დასკვნა სამთავრობო პოზიციას ეთანხმება და ამბობს, რომ ჩხუბისთავი რუსეთია და თბილისი იძულებული გახდა მოსკოვისთვის ხელი შეებრუნებინა. დასკვნის ვრცელი ნაწილი თვითკრიტიკასაც დაეთმო. კომისიამ ხელახლა აღმოაჩინა ყველასათვის ცნობილი ხარვეზები სამხედრო ოპერაციების დაგეგმვასა და განხორციელებაში.

,,შეიარაღებული ნაწილის დაკარგვა განაპირობა ხარვეზებმა ოფიცერთა საკადრო პოლიტიკაში,” წერია დასკვნაში. ,,აღსანიშნავია ის ფაქტიც, რომ ოფიცერთა გარკვეულმა კონტინგენტმა ომის დაწყებამდე, მხოლოდ რამდენიმე დღის წინ დაასრულა სასწავლო კურსი.” აქვე ნათქვამია, რომ გენერალურ შტაბს არც უკან დახევის გეგმა ჰქონია და ოპერატიულ რეჟიმში უწევდა გადაწყვეტილების მიღება. აქედან მორალი: ,,აუცილებელია საკადრო ცვლილებები, როგორც პოლიტიკურ, ისე სამხედრო თანამდებობის პირებს შორის.”

ამ დასკვნის გასაკეთებლად კომისიამ არაერთი მაღალჩინოსანი დაკითხა, ბევრი დოკუმენტაცია მოიძია და საკანცელარიო დანიშნულების ნივთიც კი ტყორცნა დაკითხვის ერთ-ერთ ობიექტს.

კომისიამ საქართველოს რუსეთში ყოფილი ელჩის ეროსი კინწმარიშვილის სკანდალურ ჩვენებაც უარჰყო და მტკიცებულებებზე დაყრდნობით დაასკვნა, რომ ა.შ.შ.-ს მწვანე შუქი არ მიუცია საქართველოსთვის სამხრეთ ოსეთში სამხედრო ოპერაციის დასაწყებად.

სტუდენტი, ზვიად ბარქაია კომისიის მუშაობას სკეპტიკურად უყურებს. მისი თქმით ერთ დროს რადიკალური ოპოზიციის რიგებში მყოფი პაატა დავითაია, რომელიც კომისიას ხელმძღვანელობს დღეს ორმაგ თამაშს თამაშობს.

ბარქაია აზრით დასკვნას კონკრეტიკა აკლია. ,,ჩვენ დასკვნიდან ვიგებთ, რომ საჭიროა აქტორების დასჯა, მაგრამ ხელისუფლება საკადრო ცვლილებებს ახორციელებს არა ამ დასკვნის საფუძველზე, არამედ სულ სხვა მიზეზების გამო.”


პოლიტოლოგ რამაზ აბესაძეს მიაჩნია, რომ კომისიის დასკვნა მნიშვნელოვი დოკუმენტია, რომელიც საზოგადოებას საშუალებას მისცემს დეტალურად გაეცნოს აგვისტოში განთვითარებული მოვლენების გამომწვევ მიზეზებსა და გარემოებებს.

Wednesday, December 24, 2008

სცენის მიღმა ან როგორც გენებოთ (დააწკაპუნე აქ ფოტოების დასათვალიერებლად)


ფოტო-რეპორტაჟი კულისებიდან
შობის დღესასწაული კარს არის მომდგარი და შექსპირის უკვდავი პიესის ,,12-ე ღამის” პერსონაჟები კიდევ ერთხელ გაცოცხლდნენ რუსთაველის თეატრის სცენაზე. ნინო ჭაბუკიანმა და ანა ცხოვრებოვამ თეატრის შიდა სამზარეულოში შეაღწიეს და კულისებსა თუ სცენაზე განვითარებული მოვლენების მომსწრენი გახდნენ.

Thursday, December 18, 2008

სილამაზის მსხვერპლნი

თამთა შკუბულიანი
თბილისი. 18 დეკემბერი, 2008.


თბილისში არასეზონურად გარუჯული გოგონების გამოჩენა მომრავლებული სოლარიუმების დამსახურებაა. ქალბატონები არაფერს დაუდევენ ჯანმრთელობისთვის შესაძლო რისკებს და, ყოველგვარი გადამეტების გარეშე, გულისწასვლამდე ირუჯებიან ფლურესენციულ მაყალზე. საკუთარი გარეგნობის სრულყოფის სურვილმა მამაკაცებიც შეიპყრო და დღეს არაერთი ქართველი ვაჟკაცი ნებიერად ეფიცხება ულტრაიისფერ სხივებს.

სოლარიუმში გატარებული რამდენიმე წუთი უკეთეს ეფექტს იძლევა ვიდრე თაკარა მზის ქვეშ ქანცის გაწყვეტამდე წოლა. ეს ერთი შეხედვით მოხერხებული მეთოდი შეიძლება ჯანმრთელობისთვის საზიანო იყოს, განსაკუთრებით თუ არ შესრულდა სათანადო პროცედურები, რაც საქართველოში ყოველთვის არ ხდება.

ექიმები ამბობენ, რომ სოლარიუმის რეგულარული გამოყენება დაუშვებელია, ვინაიდან 20-30 ვიზიტი შეიძლება სამი სახის კანის კიბო გამოწვევი მიზეზი გახდეს. ზოგადად, კიბოს მზის რადიაციაც იწვევს, თუმცა ულტრაიისფერი გამოსხივების შედეგად დაავადების რისკი დაახლოებით 10%-ით იზრდება.

ეს რისკები ბანოვანთა ენთუზიაზმს სულაც არ ანელებს. ,,ბუნებრივ ნარუჯს ნამდვილად არ ჯობია, მაგრამ ზამთარია და რა უნდა ქნა?” – კითხულობს 18 წლის თეონა გაგნიძე. ასეთ გამოუვალ მგომარეობაში, სხვა რა დაგრჩენიათ თუ არა მიმართოდ სოლარიუმს, რათა თანაბრად შეფერილი და გაკრიალებული კანით შეყვარებულებსა თუ ნაცნობ-მეგობრებს მოაწონოთ თავი.

ქალის გარეგნული სილამაზის მთავარ შემფასებელთა – მამაკაცთა შეხედულება გარუჯულ კანზე არაეთგვაროვანია. 23 წლის ლევან მიქელაძეს მოსწონს გარუჯული გოგონები, მაგრამ აქვე დასძენს კანის ფერი ბუნებრივად უნდა გამოიყურებოდეს.

ლაშა ნიკურაძე კი საერთოდ იწუნებს შავგვრემან გოგონებს. ,,ეს გარუჯომანია მაგარი არ მევასება, და მითუმეტეს ზამთარში რო ხედავ ტიპი ისეთი შავია, რომ აშკარად შეატყობ მთელ დღეს სოლარიუმში ატარებს”, - ამბობს ლაშა.

20 წლის გიო თოლორდავას შეხედულება უფრო ნეიტრალურია. ,,მე გართულება არ მაქვს სოლარიუმში დაზაგრულ გოგოებზე, იმას მაინც ჯობია ტონა ,ზაგარნი’ კრემები რო ადევთ ხოლმე სახეზე.”

ხელოვნური გარუჯვის ნოუ-ჰაუ გერმანელებს ეკთუვნით და დღეს ეს პრაქტიკა მთელ მსოფლიოშია გავრცელებული. გერმანული ფირმა ,,ერგოლაინის” სოლარიუმები საქართველოში სულ რამდენიმე წელია რაც შემოვიდა. არსებობს დასაწოლი და აგრეთვე უფრო თანამედროვე -- დასადგომი ე.წ. ტურბო სოლარიუმები. 1 წუთის ფასი 1,50-დან 2,50 ლარამდე მერყეობს.

ყოველდღიურად სოლარიუმში სიარული რომ არ შეიძლება, ამას სალონის მომსახურე პერსონალიც გვეუბნება. თუმცა ხდება ისეც, რომ კლიენტებს “გულს არ წყვეტენ” და უარს არ ეუბნებიან ყოველდღიურ სიამოვნებაზე.

ყოფილა ისეთი შემთხვევები, როცა გოგონებს გული წასვლიათ, მიუღიათ დამწვრობა ან ცუდად გამხდარან გამოსხივებისგან. Bლოოდ დრომდე ხელოვნური მზის აბაზანების მოყვარულმა ქეთი აბაშიძემ ხელი აიღო სოლარიუმში სიარულზე მას შემდეგ, რაც ერთხელ კაბინაში გონება დაკარგა. ,,სოლარიუმში რეგულარულად დავდიოდი, თუმცა ახლა აღარ დავდივარ”, - ამბობს 20 წლის ქეთი. “12-15 წუთიც ვყოფილვარ, მაგრამ არაფერი მომსვლია. თუმცა, იყო ერთხელ შემთხვევა, როცა 10 წუთიც ვერ გავძელი და გული წამივიდა. რაც ყველაზე მთავარი იყო როცა აზრზე მომიყვანეს, მეუბნებოდნენ, რომ შენ არაფერი არ მოგსვლია, უბრალოდ ჩაიკეცე, ალბათ დაიღალე, გული არ წაგსვლაო.”

სოლარიუმის თანამშრომლები ასეთ შემთხვევებზე პასუხიმგებლობას არ იღებენ. პოპულარულ სილამაზის სალონ ,,ნატალიში” მიაჩნიად კლიენტებმა თავად უნდა იზრუნონ საკუთარ ჯანმრთელობაზე. ,,ჩვენ ვაფრთხილებთ, რომ რეგულარული სიარული და ყოველდღე 10-15 წუთი დგომა არ შეიძლება, მაგრამ მაინც მოდიან იმ იმედით, რომ არაფერი არ მოუვათ. თუ რაიმე ასეთი შემთხვევა მოხდება პასუხისმგებლობას ნადვლად არ ვგრძნობთ”, - განაცხადა ,,ნატალის” თანამშრომელმა, რომელაც საკუთარი სახელისა და გვარის დასახელება არ მოისურვა.

სილამაზის სალონი “ფემინაშიც” საუბრობენ გვერდით მოვლენებზე, თუმცა მიაჩნიათ, რომ ზოგჯერ კლიენტები უსაფუძვლოდ მიზეზობენ. “ხშირად კანი უწითლდებათ ხოლმე და ჰგონიათ, რომ ეს სოლარიუმის ბრალია. სინამდვილეში ასე არ არის. კანის ფერს გააჩნია, ვინც ძალიან თეთრია იმას კანი გაუწითლდება, ისევე როგორც მზეზე და მას მეტი დრო დასჭირდება სასურველი ფერის მისაღებად”, - განაცხადეს კომანიის ოფისში.

ხელოვნური გარუჯვის შემდეგ საჭიროა სპეციალური კანის საცხის ხმარება, რომლითაც საზღვარგარეთ ,,ერგოლაინის” თითქმის ყველა სოლარიუმში კლიენტები უფასოდ სარგებლობენ. ჩვენთან კი უნდა შეიძინოთ თუ, რაღა თქმა უნდა, გსურთ კანი არ დაგეწვათ.

იმუნიტეტის დაქვეითების გარდა, სოლარიუმი სხვა რისკების მატარებელიცაა. ყოველი პროცედურის შემდეგ აუცილებელია კაბინის ზედაპირის გაწნემდა სპეციალური ხსნარის მეშვეობით, ვინაიდან ზედაპირზე რჩება თვალით უხილავი ბაქტერიები, რომლებიც იწვევენ ხშირად კანის დაავადებებს, როგორიცაა ფსორიაზი ან ეგზემა. თბილისში, რამდენადაც რესპონდენტები ამბობენ, ყოველი პროცედურის შემდეგ ნამდვილად არ იწნიმდება სოლარიუმები, მით უმეტეს, სპეციალური ანტიბაქტერიული ხსნარის მეშვეობით.

სოლარიუმს, როგორც აღმოჩნდა, აქვს დადებითი მხარეც. როგორც პროფესორმა მარინა ნოზაძემ გვითხრა,…იგი ზრდის კანში D ვიტამინის შემცველობას, რომელიც, თავის მხრივ, მნიშვნელოვანი და სასარგებლოა სხვადასხვა ადამიანური ფუნქციების რეგულირებისათვის, როგირცაა სისხლის მიმოქცევა. ეს ვიტამინი კალციუმისა და ფოსფორის ნაკლებობას შველის და ძვლების გამაგრებისაც უწყობს ხელს.

სპეციალისტები სოლარიუმის მოყვარულთ სიფრთხილეს ურჩევენ. გოგონებს ვერანაირი ძალა ვერ ჩაუხშობს გარეგნობის სრულყოფისკენ სწრაფვას, მაგრამ თუ არჩევანი ესთეტიურ სილამაზესა და ჯანმრთელობას შორის დგება, აჯობებს არჩევანი ამ უკანასკნელის სასარგებლოდ გააკეთდეს.

Friday, December 12, 2008

საქართველოსა და ,,შეშფოთებული” ნატოს ფლირტი

თამარ სვანიძე. თბილისი.
12 დეკემბერი, 2008

რუსული აგრესიის შემდეგ საქართველოში 26 სახელმწიფოს გაერთიანებული სამხედრო პოტენციალის უკან ამოფარების სურვილი კიდევ უფრო გამძაფრდა. დღეს ქვეყნის ხელისუფლება და მისი ამერიკელი პარტნიორები ქართველებს აქტიურად მიერეკებიან ნატოსკენ, თუმცა ალიანსის მძიმეწონიანი წევრები საქართველოს არასრულწლოვანი დემოკრატიის ამ პრესტიჟულ კლუბში მიღებისგან თავს იკავებენ. გაცხადებული მიზეზების თანახმად, საქართველომ სამხედრო და დემოკრატიული ჩამორჩენილობის გამო ,,ფეის-კონტროლი” ვერ გაირა. თუმცა, ანალიტიკოსების აზრით, ევროპელები რუსეთის გაღიზიანებას გაურბიან. თავდაპირველად ალიანსის წევრები ხომ სწორედ ცივი ომის პერიოდში მოსკოვის სამხედრო პოტენციალის გასანეიტრალებლად შეიკრნენ. რუსეთის საზღვრებთან მიჩოჩებულ ნატოს კრემლი დღესაც ეროვნულ საფრთხედ მიიჩნევს. ნატოს აპოლოგეტების აზრით, ალიანსის წევრობა საქართველოს ნანატრ სტაბილურობას მოუტანს. თამარ სვანიძეს მიერ გამოკითხულ სტუდენტთა უმრავლესობა ამ მოსაზრებას იზიარებს.

ქართული საზოგადოება აჟიტირებულია საქართველოს ნატოში შესვლის საკითხით. ქვეყნის ჩრდილო ატლანტიკურ ალიანსში ინტეგრაციის თემაზე უამრავი კითხვა ისმის, რომლებსაც უშურველად პასუხობს ნატოს საინფორმაციო ცენტრი აგიტ-პროპაგანდის სხვადასხვა საშუალებებით: ფლაერების დარიგება, რეკლამა და ა.შ. საქართველოს ნატოში გაწევრიანება საზოგადოების ნება და არჩევანია, გვაუწყებს ნატოს საინფორმაციო საიტი ( http://natoinfo.ge/ ).

იმის გასარკვევად თუ რამდენად გათვითცნობიერბულია ქართული ახალგაზრდობა, ნატოს როგორც ორგანიზაციის და საქართველოს მასთან ინტეგრაციის მნიშვნელობაში, ჩავატარეთ მცირე გამოკითხვა სტუდენტებს შორის. რეზულტატი კი შემდეგია: გამოკითხულ სტუდენტთა თითქმის მთელ კონტინგენტს აქვს საერთო წარმოდგენა ნატოს შესახებ და გაწევრიანების მომხრეცაა. თსუ-ს მესამე კურსის სტუდენტის თამთა ღლონტის თქმით, ნატო ეს არის: “ჩრდილო ატლანტიკური ორგანიზაცია, ქვეყნების სამხედრო ალიანსი, რომელიც უზრუნველყოფს წევრი ქვეყნების უსაფრთხოებას. პატარა ქვეყანა ვართ და ეს არის აგრესორისგან თავდაცვის საშუალება. ნატო ბოლოსდაბოლოს “შეშფოთებული” მდგომარეობიდან უნდა გადავიდეს ქმედებებზე.”

საზოგადეობის დიდი ნაწილის მსგავსად სტუდენტ ზიზი ქახრაშვილს იმედი აქვს, რომ ალიანსში გაწევრიანების შემთხვევაში რუსეთის შესაძლო აგრესიას უკვე მრავალწევრიანი ნატო გასცემს პასუხს. “ნატო ეს არის ქვეყნების გაერთიანება, როლებიც ომის შემთხვევაში ერთმანეთს დაეხმარებიან. მასში უნდა გავწევრიანდეთ, რათა რუსეთის აგრესიისაგან დავიცვათ თავი,” - ამბობს ზიზი.

მესამე კურსელი მარიამ ქვრივიძე მიიჩნევს, რომ უსაფრთოხეობასთან ერთად ნატოს წევრობა დააჩქარებს ქვეყნის დემოკრატიულ განვითარებას. “ნატო ეს არის ორგანიზაცია, რომელშიც უნდა გაწევრიანდეს საქართველო, რათა იყოს დაცული და განვითარდეს დემოკრატიული გზით. მასში გაწევრიანება ნიშნავს, როგორც უფლებების, ასევე მოვალეობების გაზრდას”, - თქვა მარიამმა.

ჩრდილო ატლანტიკური ორგანიზაციის მოკლე დეფინიცია შემდეგი არის: ნატო - არის ჩრდილო ატლანტიკური ხელშეკრულების ორგანიზაცია. წარმოადგენს ჩრდილოეთ ამერიკისა და ევროპის ქვეყნის ალიანსს, რომელიც მეორე მსოფლიო ომის დასასრულს 1949 წლის 4 აპრილს დაარსდა. წევრი სახელმწიფოები საერთო ღირებულებების საფუძველზე გაერთიანდნენ და გარეშე მტრის (პირველ რიგში საბჭოთა კავშირი იგულისხმება) მხირდან თავადსხმის მოგერიება ერთობლივი ძალებით გადაწყვიტეს. ალიანსის სოლიდარობა და ერთიანობა იმის გარანტია, რომ უსაფრთხოების პრობლემების შემთხვევაში ქვეყანა მხოლოდ საკუთარ შესაძლებლობებს არ დაეყრდნობა. ერთი წევრი სახელმწიფოს დამუქრების შემთხვევაში ნატო ყველა წევრი ქვეყნის კოლექტიურ რეაგირებას ითვალისწინებს. მართალია ნატოში შესვლის უკანასკნელი მცდელობები უშედეგო აღმოჩნდა, მაგრამ ამერიკაში ახალი ადმინისტრაციის მოსვლასთან ერთად საქართველო სავარაუდოდ ალიანსის კარებს განახლებული ძალით დაეჯაჯგურება.

Wednesday, December 10, 2008

გარდერობის ,,აფდეიტი‘‘ ინტერნეტის საშუალებით

ქეთი თოდუა
თბილისი. 10 დეკემბერი, 2008


მაღაზიებსა თუ ბაზრობაზე საათობით ყიალის ნაცვლად ქართველ მომხმარებელთა მზარდი რაოდენობა ტანისამოსის შეძენას ინტერნეტით ამჯობინებს. ინტერნეტით ვაჭრობამ გეოგრაფიული საზღვრები არ იცის და მისი მეშვეობით მრავალფეროვნებას მოწყურებლ ქართველ მყიდველს ნებიესმიერი ქვეყნიდან, ნებისმიერი საიტიდან შეუძლია გამოიწეროს ტანსაცმელი.

სახლიდან გაუსვლელად ვაჭრობის უპირატესობას სულ უფრო მეტი ქართველი მომხმარებლი აფასებს, თუმცა არიან სკეპტიკოსებიც, რომელთა უნდობლობა ონლაინ სერვისების მიმართ ბოლომდე უსაფუძვლო არ არის. იყო შემთხვევები როცა საგულდაგულოდ შერჩეული შანელის კაბის ნაცვლად, ამანათში ჯინსის შარვალი აღმოჩნდა. მართალია ტანსაცმელი შეიძლება სულ რაღაც ერთ კვირაში პირდაპირ სახლში მოგართვან, მაგრამ ბევრისთვის მომსახურების საკომისიო ფასნამატი ვაჭრობის ამ ფორმას ხიბლს უკარგავს.


ოცი წლის თაკო ჩუბინიძე მაშინ მიუჯდა ინტერნეტს, როდესაც მწირი არჩევანის გამო თბილისში ტანსაცმლის ყიდვაზე საბოლოოდ აიცრუვა გული. ,,ძირითადად, უცხოეთიდან ჩამოაქვთ მშობლებს ჩემთვის ტანსაცმელი‘‘, - ამბობს თიკო. მას თვეების განმავლობაში უხცოეთიდან ახლობლის დაბრუნების ლოდინიც მოყირჭდა და მეგობრებთან ერთად გადაწყივტა საკუთარ ჩაცმულობაზე ინტერნეტით ეზრუნა.
სამოსის ინტერნეტით გამოსაწერად საჭიროა გქონდეთ საკრედიტო ბარათი, გახსნათ საიტზე თქვენი ანგარიში და შეარჩიოთ სასურველი პროდუქცია. სხვადასხვა საიტზე მომსახურების განსხვავებული საკომისიო ტარიფები მოქმედებს.

მათ, ვისაც საკრედიტო ბარათი არ აქვს, შეუძლიათ დახმარებისთვის ამ პროფილით მომუშავე კომპანიებს მიმართონ. არსებობს რამდენიმე კომპანია, რომელთა დახმარებითაცბლოგგერ შეგიძლიათ ინტერნეტით პროდუქციის გამოიწერა. თუმცა, სხვა საკითხია, რამდენად კარგად მოგემსახურებიან ასეთ კომპანიებში.

ანი მარდალეიშვილი ასეთ ფირმებს ეჭვის თვალით უყურებს. ,,ერთმა ნაცნობმა მითხრა, რომ არის ძალიან კარგი ფირმა, რომელიც დაგვეხმარებოდა ნებისმიერი საიტიდან რაღაცეების გამოწერაში‘‘, - ამბობს ანა. ,,როგორც აღმოჩნდა, ამ ფირმის წარმომადგენლებს ამერიკაში ჰყავთ ნაცნობი, რომელიც ამერიკული საიტებიდან საკუთარი საკრედიტო ბარათით იწერს იმ ტანსაცმელს, რომელსაც ჩვენ აქ ავარჩევთ. შემდეგ კი საქართველოში აგზავნის. რეალურად, ამ ფირმას არანაირი კავშირი არ აქვს საიტებთან, საიდანაც ჩვენ ტანსაცმელს ვიწერთ.’’

ანას თქმით, ყოფილა შემთხვევა, როცა გზავნილი დაკარგულა, ან სხვა ზომის ტანსაცმელი ჩამოუტანიათ. ,,[შუამავალ ფირმებს] კი არანაირი პასუხისმგებლობა არ ეკისრებათ‘‘, - ამბობს ანა. ,,იმ ფირმაში ხალხის დიალოგიდან გავიგე, რომ ერთმა ქალმა შეუკვეთა შანელის კაბა და ჩამოუვიდა ჯინსები. ერთს ორივე ფეხსაცმელი მარცხენა ჩამოუვიდა. მე მითხრეს, რომელი საიტიდანაც ფეხსაცმლის გამოწერა გინდა, არ ვარგა, ჩინური, უხარისხო ფეხსაცმელი აქვთო. თვითონ ისიც არ იცოდნენ რა ზომა უნდა შეეკვეთათ. მინდოდა 38 ზომა. მითხრეს შენ 7 ან 7,5 ზომა გჭირდებაო, არა 8 ან 8,5-იო. საბოლოოდ დაასკვნეს, 9 ზომაც არ გექნება დიდიო.‘‘

განსხვავებული აზრისაა ხატია ლაშაური. ის ინტერნეტით ტანსაცმელს ძალიან ხშირად იწერს და არ ემდურის ამ სერვისს. ,,დაახლოებით, ორი წელია შოპინგს ინტერნეტის დახმარებით ვაწყობ‘‘, - ამბობს ხატია. ,,შევდივარ საიტებზე, ვათვალიერებ ახალ კოლექციებს და რაც მომეწონება ვიწერ. ტანსაცმლის გამოწერა ძალიან ადვილი პროცესია... არჩეულ ტანსაცმელს ერთ კვირაში სახლში მოგიტანენ. ჯერ არ მომხდარა ისე, რომ გამოწერილი ტანსაცმელი ან ფეხსაცმელი არ მომრგებოდა. ყოველთვის ის ზომა, ფერი და ხარისხი ჩამომდის რომელსაც ვუკვეთავ.”

ანას აზრით ინტერნეტით ტანსაცმლის შეძენის ფასებიც არა არის ოპტიმალური. ,,მე რომელი ფეხსაცმლის გამოწერაც მსურდა ღირდა 19 დოლარი. ამ ფასს ემატებოდა აქ ჩამოტანის ფასი ერთ კილოზე 32 დოლარი და ფირმის მომსახურების 5%. საბოლოო ჯამში ძვირი გამოდიოდა. საბოლოოდ, ფეხსაცმლის გამოწერა გადავიფიქრე‘‘, - ამბობს ანა.

ონლაინ შოპინგით მარი ასათიანიც სარგებლობს და უკმაყოფილების საბაბი არ აქვს. ,,ინტერნეტით ვყიდულობ არა მარტო ტანსაცმელს, არამედ წიგნებსაც და ელექტროტექნიკასაც კი‘‘, - ამბობს მარი. ,,საიტების მომსახურებით ძალიან კმაყოფილი ვარ – არ იტყუებიან და ჩამოტანის ვადებსაც არ სცდებიან. ერთადერთხელ მომივიდა გაუგებრობა - სულ პირველად ფეხსაცმელი რომ გამოვიწერე, ერთი ზომით დიდი ჩამომივიდა. თუმცა, ეს ჩემი ბრალი იყო, მე მივუთითე ზომა არასწორად. საიტს ვერანაირ ბრალს ვერ დავდებ.”

Sunday, December 7, 2008

ჯაზი, ყვავილები და ბარაკ ობამა (დააწკაპუნე აქ აუდიოს მოსასმენად)

თბილისი, 8 დეკემბერი, 2008











28 ნომებერს გამართულ საღამოზე ჯაზ-კომპოზიციების ფონზე ამერიკის ყველაზე წარჩინებული ქართველი მეგობრები დააჯილდოვეს. ძღვენის გარეშე არც ამერიკის ახლად არჩეული პრეზიდენტი დარჩენილა. ორგანიზატორებმა ბარაკ ობამას ყვავილების თაიგულის სურათი უფეშქაშეს. ნათია გულიაშვილი ჯაზური დიპლომატიის შესახებ.

Saturday, December 6, 2008

ვპოვე ტაძარი შესაფარი უდაბნოდ მდგარი (დააწკაპუნე აქ აუდიოს მოსასმენად)

ნაზი ბერიძე
თბილისი, 6 დეკემბერი 2008.

ჯავახეთის მთებში დაკარგული ეს მონასტერი შეიძლება არ იყოს ქართული ხუროთმოძღვრების საუკეთესო ძეგლი, მაგრამ ის ყველა სხვა ქართული ეკლესიისგან გამოირჩევა – ჭულევის ეკლესია ერთად-ერთია საქართველოში, სადაც ფრესკები თავდაპირველი სახით შენარჩუნდა.

Wednesday, December 3, 2008

მოდა à-la თსუ (დააწკაპუნეთ აქ აუდიოს მოსასმენად)

გარდერობი გაძეძგილია ტანსაცმლით, მაგრამ მაინც არ იცი, რა ჩაიცვა დღეს. მაღალქუსლიანი ფეხსაცმელით დაიპყრო ვარაზის ხევის აღმართი? ფერუმარლით უხვად შელესო სახე? ჯართით დაიხუნძლო? ძნელია გააკეთო ის ერთადერთი სწორი არჩევანი, რომელიც ერთდროულად თვითდამკვიდრებაშიც დაგეხმარებათ, მამაკაცის ყურადღებასაც მიიპყრობს და მშობლების რისხვას არ გამოიწვევს. ქეთი ჩოხელმა და შორენა ხვიჩიამ გაჭორეს მოდას აყოლილი თუ ჩამორჩენილი უნივერსიტეტის ლამაზმანები.

“ბევრი რამ მიგვითითებს იმაზე, რომ ტანსაცმელს აცვია ადამიანი და არა პირიქით. ჩვენ ტანსაცმელს ვირგებთ მხრებზე თუ გულ-მკერდზე, მაგრამ სინამდვილეში ტანსაცმელი ირგებს ჩვენს გულებს, გონებასა და ენას.” ვირჯინია ვულფი.

Tuesday, December 2, 2008

საშემოსავლო გადასახადი 5%-ით შემცირდება (დააწკაპუნეთ აქ აუდიოს მოსასმენად)

ახლო მომავალში დაგეგმილი საშემოსავალო გადასახადის შემცირება შეიძლება სტუდენტურ ბიუჯეტზეც აისახოს. თსუ-ს სტუდენტები საუბრობენ გადასახადის კლებაზე ნინო გოგუას რეპორტაჟში.

Sunday, November 23, 2008

დევნილები, მიგრანტები და ,,ნატაშები“ ქარვასლაში


თამთა შკუბლიანი
თბილისი, 23 ნოემბერი, 2008 წელი

მიგრანტთა, დევნილთა და ტრეფიკინგის მსხვერპლთა ყოფის ამსახველი ფოტოების გამოფენა სახლწოდებით ,,სახლთან ახლოს’’ 19 ნოემბერს ,,ქარვასლაში‘’ გაიხსნა. შვიდი ფოტოხელოვანის ფოტო ობიექტივში იმ ადამიანების ცხოვრება მოექცა, რომელთაც სხვადასხვა მიზეზების გამო მოუხდათ საცხოვრებელი ადგილის დატოვება. გამოფენა ბრიტანული საბჭოს ვრცელი პროექტის “living together”-ის ნაწილია და მიზნად ისახავს მიგრაციული ჯგუფების პრობლემების საზოგადოებისთვის ჩვნებას და კვლევას. გახსნას ბრიტანეთის ელჩი დენის კიფი დაესწრო.



გამოფენის სტუმრებმა ყველაზე დიდი ყურადღება ტრეფიკინგის მსხვერპლთა ფოტოებს დაუთმეს. “არა ნატაშა”-ასე ჰქვია დანა პოპას მიერ გადაღებული ფოტოების განყოფილებას, სადაც იმ ქალბატონების სურათებია გამოფენილი, როლებმაც სარპოსკიპოებში მუშაობისა და ქუჩაში ცხოვრების შემდეგ სახლში დაბრუნება შეძლეს.

დანა პოპა


დევიდ კრიდონი
“ერთგულ მიცვალებულთა აჩრდილები”

სიღარიბის გამო 1949-89 ირლანდიის 800 000-ზე მეტმა მოქალაქემ საცხოვრებელი ადგილი დატოვა. დევიდ კრიდონის “ერთგულ მიცვალებულთა აჩრდილები” აღნიშნული პერიოდის ფოტოილუსტრაციაა.






აივორ პრიკეტი “სიწყნარე ქარიშხლის შემდეგ” (1991-95 წლებში ხორვატიიდან 30 000-ზე მეტი სერბი გადაასახლეს)








ფირუზ ხალაპიანი “მურთადას ამბავი” სომეხისა და ფერადკანიანის ოჯახი, რომელთაც მიუხედავად წინააგმდეგობებისა სომხეთში დარჩენა გადაწყვიტეს.


იუვალ აიარი “ხსოვნის ჩემოდნები”

აღბეჭდილია 60-იან წლებში არაბების მიერ მიტოვბული სახლები, სადაც მიგრირებული ებრაელები ჩასახლდნენ.





ზოგიერთი მიგრირებული პალესტინელი, თურმე, ძველი სახლის გასაღებს ახლაც ინახავს.(ავტორის შენიშვნა)




ჯორჯ ჯორჯიუ-- ,,კვიპროსი მიჯნებს შორის”. წარმოდგენილია კვიპროსის კონფლიქტის შედეგად დაზარალებული მოსახლეობის ყოფა.


გამოფენა პირველად ლონდონში ჩატარდა და ამჟამად სამხრეთ აღმოსავლეთ ევროპაში მოგზაურობს.
მისი ნახვა მსურველებს 25 ნოემბრამდე შეუძლიათ.

Saturday, November 22, 2008

ქუჩის ,,კოლორიტები”

ქეთი წურწუმია
თბილისი, 22 ნოემბერი, 2008 წელი







რაღა მაინცდამაინც ძაღლები?
ძაღლები იმიტომ, რომ არ მიყვარს.
ქუჩის ძაღლები კი იმიტომ, რომ
მათი ,,წყალობით” არაერთხელ
თავპირისმტვრევით მირბენია.






ძაღლები, ეს ოთხფეხა, უწყინარი (ეს ზოგიერთისთვის სადავოა) ცხოველები, ქართულ საზოგადოებაშიც ,,დაფასებულები არიან” და ბევრ ქართულ ოჯახში ,,საპატიო ადგილიც” უკავიათ. მათ ისე უვლიან, როგორც ოჯახის სრულუფლებიან წევრებს.
ძაღლის მოვლა-პატრონობა კი საკმაოდ ძვირი ჯდება. ახალდაბადებულს ესაჭიროება ,,პასპორტი” (ალბათ, იმის დასტურად, რომ ნამდვილად ძაღლია). აცრები - ძაღლის ჯანმრთელობისთვის და კიდევ იმისთვის, ვინმეზე კბილი თუ წასცდა, დასამშვიდებლად აცრილიაო რომ ვუთხრათ. საკვები - რომლის რეკლამის ყურებისას, ძაღლის რა მოგახსენოთ, მაგრამ მშიერ კაცს კი ნერწყვი მოადგება სანამ პოტენციური მომხმარებლის ვინაობას გაარკვევს. ვარჯიში, გაწვრთნა და ათასი სხვა რამ.
თუმცა, ყველას ასე როდი უმართლებს. ოჯახებში მარტო ..იღბლიანი” ძაღლები ხვდებიან. ,,უიღბლო” ძაღლების სახლი ქუჩაა. ქუჩაში ისინი იბრძვიან გადარჩენითვის, საკვებს ნაგავსაყრელებზე ეძებენ და ერთმანეთთან ჩხუბში იწვრთნებიან.
მაწანწალა ძაღლებს მრავლად შეხვდებით ჩვენი ქალაქებისა და რაიონების ნაგავსაყრელებზე. ასეთი ძაღლები კი პრობლემას წარმოადგენენ. მათ აცრებს არავინ უკეთებს და შესაბამისად არაერთი დაავადების მატარებლები არიან. თუ მაწანწალა ძაღლმა ვინმეს უკბინა, ეს რეალურ საფრთხეს უქმნის მის ჯანმრთელობას.

ქუჩის ძაღლებზე ,,ზრუნვა” კეთილმოწყობის სამსახურის (რომელიც ყველა ქალაქში ფუნქციონირებს) მოვალეობაში შედის. ,,ფურგონიანი” მანქანა მოსახლეობის განცხადების, თხოვნის (ან მოთხოვნის) საფუძველზე მიდის აღნიშნულ ადგილას და დასახლებას მაწანწალა ძაღლებისგან ,,წმენდს”. გარდა ამისა, კეთილმოწყობის სამსახური ყოველკვირეულად ამოწმებს ქუჩებ. ამ სამსახურის წარმომადგენლები ძაღლებს დაჭერისას ნემსს უკეთებენ და აძინებენ რომ არ უკბინონ, შემდეგ კლავენ და მათთვის განკუთვნილ სასაფლაოზე მარხავენ. ძაღლების ,,სასაფლაო” ნაგავსაყრელის ტერიტორიაზე მდებარეობს.
ქუჩის ძაღლების არც თუ ისე შემცირებული რაოდენობის ფონზე, ცოტა არ იყოს ძნელი დასაჯერებელია ზემოთ აღნიშნული სამსახურის მუშაობის ეფექტურობა. თუმცა, როგორც რამდენიმე საავადმყოფოს მთავარმა ექიმებმა აღნიშნეს, 2008წელს ქუჩის ძაღლების მიერ მოსახლეობის დაკბენის ფაქტები წინა წლებთან შედარებით შემცირდა. მერიის კეთილმოწყობის სამსახურის განცხადებითაც, წელს მაწანწალა ძაღლების რაოდენობის ზრდა არ შეინიშნება. როგორც ჩანს, ქუჩის ძაღლებმა პირადს ისევ ეროვნული ინტერესები არჩიეს და ომისგან ისადაც დაზაფრულ ხალხს ზედმეტი პრობლემები არ შეუქმნეს.

Wednesday, November 19, 2008

ქალები ნერვიული დაძაბულობის ზღვარზე

უსიამოვნებები ოჯახში, სამსახურში, ხანგრძლივი კონფლიქტები, საყვარელი ადამიანის დაკარგვა, დაძაბულობა.. მოკლედ ვინ მოთვლის მიზეზებს, რომელთა გამოც ადამიანი შეიძლება დეპრესიაში ჩავარდეს.

დეპრესიისგან არც მამაკაცია დაზღვეული, თუმცა არსებობს ამ მდგომარეობის გამომწვევი მიზეზები, რომლებიც სუსტი სქესის წარმომადგენლებს უფრო მეტად ახასიათებს. ფსიქოლოგი ზურა მხეიძე აღნიშნავს, რომ მამაკაცები გარეგნულად უფრო ძლიერები არიან და საზოგადოებაში ნაკლებად გამოხატავენ თავიანთ სულიერ მდგომარეობას. ქალები ემოციებს ნაკლებად იკავებენ.

ადექვატურად ვერ აღიქვამთ რეალობას? სიცოცხლე მოგბეზრებიათ? ხშირად ტირიხართ? არ იცით რა გააკეთოთ? ყველაფერს ბნელ ფერებში ხედავთ და საკუთარ თავში ჩაიკეტეთ? დიაგნოზი ნათელია - თქვენ დეპრესია გაქვთ.

ყველა ქალი სრულფასოვნად აღიქვამს საკუთარ თავს როცა გვერდით ჰყავს საყვარელი ადამიანი, თაყვანისმცემელი, მიიჩნევენ ფსიქოლოგები. თუ ეს ასე არ არის, ის კარგავს საკუთარი თავის კონტროლს და შეიძლება საქმე დეპრესიამდეც მივიდეს. ზოგჯერ გიღალატებენ, ზოგჯერ დაგშორდებიან, ზოგჯერ მიგატოვებენ. ვინ იცის კიდევ რა უსიამოვნება შეიძლება შეგხვდეთ. თქვენ წარმოიდგინეთ შეიძლება მაშინაც კი აღმოჩნდეთ დეპრესიულ მდგომარეობაში, როდესაც ძალიან ბევრს უყრვარხართ და ცხოვრება არჩევანის წინაშე გაყენებთ.

ფსიქოლოგები ამბობენ, რომ დეპრესიულ მდგომარეობას დადებითი მხარეებიც აქვს. ის წარსულის გადახედვის იდეალური საშუალებაა, რაც მოგცემთ იმის შესაძლებლობას, რომ ადრე დაშვებული შეცდომები მომავალში აღარ გაიმეორო.

მაინც რა განაპირობებს დეპრესიას? 18 წლის მარის მამაკაცთა ყურადღების ნაკლებობას არ განიცდიდა, მაგრამ მაინც მოექცა დეპრესიის მარწუხებში. მიზეზი თითქოს არატიპირუია - მის მიმართ გრძნობები ძალიან ბევრ ადამიანს ჰქონდა. და როდესაც საქმე არჩევანზე მიდგა, მარი თვეების განმავლობაში ტიროდა. ყველა, მისთვის ერთნაირად ძვირფასი ჩანდა. ძნელი იყო გადაწყვეტილების მიღება, არ უნდოდა ვინმესთვის გული ეტკინა…თუმცა ნერვიულობის გაგრძელებაც აღარ შეიძლებოდა, ჯანმრთელობის მდგომარეობა უარესდებოდა. ბოლოს და ბოლოს, გააკეთა არჩევანი ადამიანზე, რომელთანაც ფიქრობს, რომ ბედნიერი და დაცული იქნება. “ქალს ერთი უნდა უყვარდეს და არა მთელი ფარა,” - ურჩევს მარი სხვა ქალბატონებს. “არ შეიძლება ორი, ან მეტი მეორე ნახევარი გყავდეს.”

ფსიქოლოგი ზურა მხეიძე ურჩევს მარის, რომ არასოდეს იფიქროს იმაზე, ვისთანაც არ დარჩა, იმასთან ბედნიერი იქნებოდა- პირიქით. ბატონი ზურას აზრით, ქალი რომელიც არჩევანს არ აკეთებს ეგოისტია და სიამოვნებს გამუდმებით ყურადღების ცენტრში ყოფნა. ზოგადად კი ამბობს, რომ ქალი თავის არჩევანში თავისუფალი უნდა იყოს.

Monday, November 17, 2008

მე-200 საჯარო სკოლის განსაკუთრებული ბავშვები

ქეთი თიკანაშვილი
თბილისი, 10 ნოემბერი, 2008.


გლდანი, ქერჩის ქუჩა #22. წიწვოვანი ხეებით გამწვანებული სკოლის ეზო და მოფარღალალავებული საქანელები. სკოლის შესასვლელთან ახლოს საგუშაგოა. ირგვლივ ბავშვები მიმოფანტულან. მოუსვენრობით გამორჩეული 7 წლის ბექა თავის აღმზრდელს ჩაბღაუჭებია, ვერ ლაპარაკობს და მთელი მონდომებით _ ხელებით, ფეხებით, თავით, უხსნის რაღაცას.

ადრე აქ თბილისის #2 სკოლა-ინტერნატი იყო. მერე სკოლას დასახელება შეუცვალეს. იფიქრეს, სიტყვა `სკოლა-ინტერნატი” უარყოფითი დატვირთვის მატარებელია და განცალკევების, უცნაური გამორჩეულობის შეგრძნებას ქმნისო. ასე იქცა #2 დამხმარე სკოლა-ინტერნატი თბილისის #200 საჯარო სკოლად. სკოლაში შეზღუდული გონებრივი შესაძლებლობების მქონე ბავშვები სწავლობდნენ პირველიდან მეცხრე კლასის ჩათვლით.

სკოლის დერეფანში ერთმანეთს ცვლის სხვადასხვა დანიშნულების ოთახები: ჯგუფი_ბიჭების საძინებელი ოთახი, ისევ ჯგუფი_გოგონების საძინებელი ოთახი. საძინებელ ოთახებში 8-10 საწოლამდე დგას. საწოლებზე გობელენის მსგავსი ნაჭრებია გადაფარებული, კედლებზე კი ბავშვებს გაუკრავთ პლაკატები, ძირითადად ფეხბურთელებისა და ჰოლივუდის ცნობილი მსახიობების სურათები. დერეფნის კედლებზე გაკრულ სტენდებზე ნახავთ სპორტული შეჯიბრებების ამსახველ კადრებს. აქაური მოსწავლეები სხვა სკოლის ბავშვებს ხვდებიან. აქვეა სპეციალური ოლიმპიადის ეგიდით ჩატარებული ფეხბურთის ჩემპიონატის სურათები. “ეს მე ვარ! თასი რო უჭირავს, მე ვარ!”_ერთ ხმად ყვირიან მათე, ნიკა, ავთო, ხვიჩა...

ამ დროს კი ერთ-ერთ ოთახში სკოლის კიდევ ერთი მაცხოვრებელი, შორენა “ბრეიქდანსს” ცეკვავს. შორენას ოცნება ჯერ კიდევ დიდი ხნის წინ ყოფილა ბრეიქდანსის სწავლა. ახლა ოცნების ასრულების ეტაპზეა და მთელი მონდომებით ახდენს ნასწავლი ილეთების დემონსტრირებას. ბრეიქდანსში გავარჯიშებას შალახო მოსდევს. ბავშვებიდან ზოგი ტაშს უკრავს, ზოგი კი საერთოდ ვერ ამჩნევს შორენასა და მის თვითნასწავლ შალახოს. პატარა მარის, მაგალითად, თავისი აღმზრდელისთვის შემოუხვევია ორივე ხელი ფეხებზე, მუცლამდე წვდება და მთელს მუცელს უკოცნის. ”ყველას შენ როგორ უნდა კოცნო, შე ჭინკა!”- ”უბრაზდება” ქერა, ცისფერთვალება მარის რუსიკო ”მასწი”.

სკოლის დირექტორი, მარინა უჯმაჯურიძე, უკვე მერამდენედ იხსენებს მე-200 სკოლის კიდევ ერთ მოსწავლეს – საშკას: “ციგანი” საშკა შაკიროვი პატრულს მოუყვანია #200 საჯარო სკოლაში. ერთი წელი საშკა მშვიდად ცხოვრობდა ბავშვთა სახლში. მერე კი დედამ მიაგნო ”დროებაში’ გასული სიუჟეტით. ,,ციგნების ‘შანტრაპა’ დაგვადგა_საშკა გამოიყვანეთო“ - ღიმილით ყვება ქალბატონი მარინა. იმის მერე ასეა: დაბრუნება_გაპარვა; დაბრუნება_გაპარვა. იმიტომ, რომ გაიგო რა ”კაია” ქუჩა.

თუ ცნობისმოყვარეობა გძლევთ და დირექტორის კაბინეტში შეიხედავთ, მოსწავლეების ნამუშევრების დათვალიერებასაც შეძლებთ. ხალისიანი ფერების მთელი კორიანტელია: ყვითელი, ვარდისფერი, ცისფერი, თეთრი. კედელზე ჩარჩოში ჩასმული ნაქარგები კიდია: ლურჯ ფონზე თეთრი ცხენისა და ასევე თეთრი გოგონას სახეები, წითელ ფონზე შესრულებული ძალიან ფერადი ნატურმორტი და თქვენ წარმოიდგინეთ, იაპონელი გეიშებიც კი. აქვეა სიგელები, ფეხბურთის, ტენისისა და მძლეოსნობის შეჯიბრში მოპოვებული ჯილდოები.

საღამოვდება და სკოლაში სიჩუმე დგება, შორენა ამჯერად ეზოში ზის სკამზე. ოდნავ მოშორებით მათე და ბექა ქანაობენ საქანელაზე.

Sunday, November 16, 2008

გაძვირებული მეგობრობა

შორენა ხვიჩია
თბილისი, 16 ნოემბერი, 2008 წელი

უფასოდ აღარ, მაგრამ ახლა უკვე 1.18 დოლარად, ინტერნეტის ნებისმიერ მომხმარებელს შეუძლია ისარგებლოს
"одноклассники"-თ

ეს საიტი, რომელიც მომხმარებელს საშუალებას აძლევს მოძებნოს ძველი ნაცნობ–მეგობრები, დიდი პოპულარობით სარგებლობს, როგორც დსთ–ს, ისე დასავლეთ ევროპის ქვეყნებში.

ბოლო დროს, საქართველოშიც, სადაც არ უნდა მოხვდე, ყველგან, ერთ-ერთი მთვარი სასაუბრო თემა "одноклассники"–ია.

საიტის მომხმარებელთა რიცხვი დღითიდღე იზრდება და დღეისთვის 25 მილიონს აღწევს.
თუმცა, მომხმარებელთან ერთად “იზრდება” საიტით სარგებლობის ფასიც. ცოტა ხნის წინ საიტზე დარეგისტრირება და ფოტოს შეფასება ფასიანი გახდა.

ვარაუდობენ, რომ მალე საიტზე შესასვლელადაც მომხმარებელს თანხის გადახდა მოუწევს.

საინტერესოა, როგორ აისახება მომხმარებელზე ფასის ზრდა, თუმცა, ფაქტია, რომ ჯერ–ჯერობით “ადნაკლასნიკელებს” ერთმანეთთან ისევ აქტიური ურთიერთობა აქვთ. ისინი ისევ ქმნიან ჯგუფებს, სადაც სხვადასხვა ინტერესების მქონე ადამიანები ერთიანდებიან და უფრო ახლო ურთიერთობას ამყარებენ ერთმანეთთან.

ერთ-ერთი ასეთი ჯგუფის, “ხვიჩიების”, მოდერატორი ვლადიმერ ხვიჩია ამბობს, რომ “одноклассники"–ს წყალობით ბევრი კარგი ადამიანი და ნათესავი აღმოაჩინა.

“ერთხელაც მომინდა გამეცნო ჩემი უცნობი ნათესავები და გავაკეთე ჯგუფი, სადაც ყველა დავპატიჟე. მერე შევხვდით და ერთმანეთი გავიცანით, მაგრამ ამ საიტს კარგის გარდა ბევრი ცუდი მხარეც აქვს. მაგალითად, ის, რომ ძალიან დიდ დროს მაკარგვინებს,” – ამბობს ვლადიმერ ხვიჩია.

თბილისის სახელმწიფო უნივერსიტეტის სტუდენტი ედუარდ სააკიანი კი “одноклассники"–ს საზღვარგარეთ მყოფ მეგობრეთან საკონტაქტოდ იყენებს და მიაჩნია, რომ ეს საიტი ძველი კლასელების და მეგობრების მოსაძებნადაა შექმნილი და არა ახალი ნაცნობების შესაძენად.

“ბევრი მეგობარი მყავს საზღვარგარეთ და “одноклассники” მათთან ურთიერთობის ერთ–ერთი საშუალებაა[...] ეს საიტი რუსეთში იმდენად პოპულარულია, რომ თანამშრომლები სამუშაო საათების მნიშვნელოვან ნაწილს “одноклассники”-ში ატარებენ, ამიტომ თუ აღმოჩნდა, რომ სამუშაოს დაწყების მსურველი ამ საიტის მომხმარებელია, სამუშაოდ არ აჰყავთ,”–ამბობს სააკიანი.

მიუხედავად იმისა, რომ არსებობს ასეთივე ფორამტის სხვა საიტიებიც, ფაქტია, რომ ქართველი მომხმარებელი უპირატესობას მაინც “одноклассники"–ს ანიჭებს. იხ.

Wednesday, November 12, 2008

ცხოვრებისეული გაკვეთილი დაპირებული სამსახურის ნაცვლად



ნინო გელაშვილი
თბილისი, 12 ნოემბერი, 2008 წელი

უკანასკნელ დროს მომრავლებულ დასაქმების კომპანიებისთვის უმუშევრები შემოსავლის ულევ წყაროდ იქცა, ხოლო გაწბილებულ სამსახურის მაძიებელთა რივხვი მატულობს.

19 წლის ნინო წიკლაური `PR ჯგუფში ორი თვის წინ გაზეთ `სიტყვა და საქმეში` წაკითხული განცხადებით მოხვდა. მისი თქმით, ჭავჭავაძის #39-ში გასაუბრებაზე მისულს, აუხსნეს, რომ სამსახურს იმ შემთხვევაში დაიწყებდა, თუ ტრეინინგ-კურსს გაივლიდა, რომელშიც 30 ლარი უნდა გადაეხადა. მან შემთხვევით გაიგო, რომ ამ კურსის შემდეგ მუშაობის დასაწყებად საჭირო იყო 600 ლარი. ამიტომ, ნინო აღარ დაინტერესებულა კომპანიაში საქმიანობით. მისი თქმით, არსად იყო იმის გარანტია, რომ ამ თანხის გადახდის შემთხვევაშიც კი მართლაც დაიწყებდა მუშაობას და გადაწყვიტა აღარ მისულიყო. ნინო დარწმუნებულია, რომ მსგავსი ამბავი მხოლოდ მას არ შეემთხვა და კიდევ ბევრი ახალგაზრდაა ცრუ დაპირებების საფუძველზე აღმოჩნდა კომპანიაში.

როგორც დასაქმების სხვა მსურველები ამბობენ, ტრეინინგების შემდეგ 600 ლარი მათ საქონლის შესაძენად და მისი რეალიზაციისთვის სჭირდებოდათ. თუმცა, ამის შესახებ წინასწარ არავინ არაფერი იცოდა. კომპანიის წარმოამდგენლების თქმით, ამ პროდუქციის გაყიდვის შემდეგ თანხა უკან დაუბრუნდებოდათ. მაგრამ რესპონდენტები ამბობენ, რომ პროდუქტის რეალიზებას უმეტესობა ვერ ახერხებს და ეს კომპანიაც, სწორედ, ასეთ `გაბრიყვებულ` ახალგაზრდობაზეა გათვლილი.

`PR ჯგუფის` ტრეინინგების სპიკერი, ბაქარ გელაშვილი, განმარტავს, რომ ისინი ე.წ. `ტიენსის` მოდელზე ქსელური მარკეტინგის პრინციპით მუშაობენ. როგორც გელაშვილი ამბობს, ქსელური მარკეტინგისთვის დამახასიათებელია ინფორმაციის ეტაპობრივად მიწოდება, ამიტომ შესაძლოა დასაქმების მსურველი პირველივე ინტერვიუდან ბოლომდე ინფორმირებული ვერ წავიდეს. მისი თქმით, მათი საქმე სწავლებაა და არა - დასაქმება.

რაც შეეხება კომპანია `ტიენსს`, გელაშვილის თქმით, ის საქართველოში 2003 წელს შემოვიდა. 2008 წლის დასაწყისიდან, სახელმწიფოსთან შექმნილი საგადასახადო პრობლემების გამო, `ტიენსი` აღარ ფუნცქიონირებს. კომპანიის თანამშრომლებმა, რომელთაც გარკვეულ წარმატებას მიაღწიეს, გადაწყვიტეს საკუთარი ოფისები გაეხსნათ და `ტიენსის` პრინციპით გაეგრძლებინათ მუშაობა. ერთ-ერთი მათგანია `PR ჯგუფი`, `MLM technology” (Multy Level Marketing, სიტყვასიტყვით ნიშნავს ქსელურ მარკეტინგს), რომელიც ტექნიკის დისტრიბუციაზე მუშაობს.

წლების განმავლობაში ჯერ კომპანია `ტიენსი` და შემდეგ მისი საქმიანობის გამგრძელებელი სხვა კომპანიები ერთი სისტემით მუშაობენ. განცხადებაში უთითებენ მაღალანაზღაურებად საოფისე სამსახურს ადგილზე შესწავლით, მაგრამ იქ მისულთ, ხვდებათ ფასიანი ტრეინინგები. მათი გავლის შემდეგ იგებენ, რომ საჭიროა დამატებით თანხა პროდუქციის შესაძენად და გასავრცელებლად. ამ საქონლის გაყიდვის შემთხვევაში, თანხა უკან უბრუნდებათ. ყოველი ახალი ადამიანის ჩართვა ამ საქმეში, მათ გარკვეულ ქულებს უგროვებთ, რაც კომპანიაში საფეხურის აწევაში ეხმარებათ.

Saturday, November 8, 2008

მარის ყვითელი რეისი


მარიამ ოზაშვილი, თბილისი,
8 ნოემბერი, 2008 წელი

თუ “ყვითელ ავტობუსში” ერთხელ მაინც მჯდარხართ, ალბათ, თქვენც ერთ-ერთი მათგანი ხართ, ვინც მთელი სიმძაფრით შეიგრძნობს საზოგადოებრივი ტრანსპორტით მგზავრობის “ხიბლს”. ეს “ხიბლი” რომ საკუთარ თავზე გამომეცადა გადავწყვიტე სულ რამდენიმე საათი გამეტარებინა ავტობუსში. შთაბეჭდილებები იმაზე მძაფრი გამოდგა ვიდე ველოდი და მინდა რამდენიმე თქვენც გაგიზიაროთ.

ავტობუსში ასვლის თანავე ყურადღებას იპყრობს მისი მძღოლი, რომელიც უკმაყოფილო გამომეტყველებით უზის საჭეს. Mმისი ეს გამომეტყველება გასაგები ხდება მაშინ, როდესც ნახავთ, რომ რამდენიმე ახალგაზრდა მგზავრობის ღირებულების გადაუხდელად ჩადის ავტობუსიდან. მძღოლი ახალგაზრდებს “სართულებიანი” მოკითხვით აცილებს.

ავტობუსში ყოფნისას ბევრი საინტერესო და სახალისო მოვლენის მოწმე შეიძლება გახდეთ. ამ მოვლენების შემდგომი განვითარების ინტერესი ხდება ხოლმე მიზეზი იმისა, რომ ავტობუსის ფანჯრიდან გახედვის სურვილიც კი აღარ ჩნდება. თუმცა, ინტერესის არ არსებობასთან ერთად, ამის საშუალებას ფანჯრებზე ზურგებაკრული მგზავრებიც არ იძლევა.

არ გაგიკვირდეთ თუ უეცრად რომელიმე მგზავრთაგანმა ხმამაღლა დაიწყო საკუთარი ლექსების კითხვა. არც რომელიმე ქალბატონის რეაქციამ გაგაკვირვოთ, რომელიც აღშფოთებას გამოთქვამს გვერდით მდგომი მამაკაცის, რბილად რომ ვთქვათ, არაეთიკურ საქციელზე. ქალბატონის აღშფოთებას იქვე მჯდომი ხანშიშესული ქალიც უერთდება და ზიზღნარევი გამომეტყველებით ამბობს: “ასე დაეთრევა ეგ უსინდისო, ვერ მოიშალა ხელების ფათური ამხელა კაცმა!” დიალოგი, რომელიც ქალბატონებს შორის იმართება შეიძლება ორი სხვა მანდილოსნის კამათმა გაწყვიტოს. ისინი აქტიურად ცდილობენ, სრული ამ სიტყვის მნიშვნელობით, გაჭედილ ავტობუსში ერთდროულად ასვლას. ტრანსპორტში ასვლის სურვილი იმდენად დიდია, რომ მათი წაკამათება სერიოზული ჩხუბის სახეს იღებს. არც ერთ მათგანს აღარ ახსოვს, რომ სწორედ ის კიბის კუთხე, რომლის დაკავებისთვისაც ასე თავგამოდებით იბრძვიან, შეიძლება მათი ტრავმის მიღების ადგილადაც კი იქცეს.ეს ხომ სწორედ ის ადგილია, სადაც ხალხით სავსე ავტობუსის ავადსახსენებელი კარი იღება. ეს პროცედურა მთელ რიგ გართულებებთან არის დაკავშირებული, ვინაიდან კარი ისე სწრაფად და ძლიერად იღება, რომ მასთან მდგომი ადამიანი გონზე მოსვლასაც კი ვერ ასწრებს, ისე აღმოჩნდება მისი სხეულის რომელიმე კიდური კარს უკან. თუმცა, სანამ კარი გაიღებოდეს, მის გვერდით, კიბეზე თავისუფალი ადგილი იმდენად მიმზიდველი და მაცდური ჩანს, რომ ამ ქალბატონების ჩხუბი უკვე გასაგებად ეჩვენება ადამიანს.

დანიშნულების ადგილამდე ჯანმრთელმა და ნერვებდაწყნარებულმა რომ მიაღწიოთ, საჭიროა, მშვიდად და იუმორით ადევნოთ თვალი გარშემო განვითარებულ მოვლენებს. დამეთანხმებით, რომ რთულია სიმშვიდის შენარჩუნება მაშინ, როდესაც თქვენს გვერდით მდგარი ყვითელ ლაბადასა და ამავე ფერის ბერეტში გამოწყობილი უცნაურგამომეტყველებიანი ქალი გიმტკიცებთ, რომ ნათელმხილველია. სწორედ იმ მომენტში, მას კოსმიური ძალები კარნახობენ, რომ ავტობუსი, რომლითაც მგზავრობთ ავტოკატასტროფისთვისაა განწირული და ცოცხალი არავინ გადარჩება. ძალიან ძლიერი სკეპტიციზმით უნდა იყო განმსჭვალული ჯადოქრებისა და ნათელმხილველების მიმართ, რომ ამ სიტყვებმა არ აგაღელვოს და ავტობუსში დარჩე. მაგრამ მალევე დააფასებთ თქვენსავე სკეპტიციზმს, როდესაც ნახავთ, რომ ნათელმხილველის “შეგონების” შედეგად ნახევრადდაცარიელებული ავტობუსით დანიშნულების ადგილამდე შეგიძლიათ თავისუფლად და უვნებელმა მიაღწიოთ.

ხალხით სავსე ავტობუსში ასვლისას ალბათ ინატრებთ კიდევ ერთ ნათელმხილველს, რომელიც ყვითელლაბადიანი ქალბატონივით თვალის დახამხამებაში გაანახევრებს მგზავრების რაოდენობას. სამწუხაროდ, ასე იშვიათად თუ უმართლებს ვინმეს.

Monday, November 3, 2008

მუშტიკრივი ჰელოუნიზე


ანანო შუბითიძე
თბილისი, 3 ნოემბერი, 2008 წელი.

დასავლეთიდან იმპორტირებულმა დღესასწაულმა, რომელიც ავი სულების განდევნას ეძღვნება, თბილისში საპირისპირო შედეგი გამოიღო და რელიგიურ რადიკალთა ჯგუფის თავდასხმით დასრულდა.

ჰელოუინი, ყველა წმინდანის მოხსენიებისა და ბოროტების დამარცხების დღე, რომელიც 31 ოქტომბერს აღინიშნება და წარმართული კელტური ტრადიციიდან მომდინარეობს, წელს თბილისშიც იზეიმეს. ქალაქის მერიის ახალგაზრდული განყოფილების და თეატრალური ინსტიტუტის სტუდენტების ორგანიზაცია „ადრენალინ.GE“-ს ერთობლივი ძალისხმევით თბილისის ძველ უბანში მოეწყო კოსტიუმირებული „ჰელოუინ ფართი“.

საღამოს 10 საათისთვის ერეკლეს ქუჩაზე ჭინკებმა, მაქციებმა და კუდიანებმა დაიწყეს შეკრება. ქუჩაზე დამონტაჟდა პატარა სცენა. ზეიმს უძღვებოდა “დი-ჯეი” ნიკა წერეთელი. ცეკვავდნენ კლუბ „ნაით ოფისისა“ და „ვერნისაჟის“ მოცეკვავე გოგონები. პანტომიმის თეატრის მსახიობებმა და ჟონგლიორებმაც თავისი ოსტატობით გაართეს საზოგადოება. იყო დღესასწაულის აუცილებელი ატრიბუტი - გოგრა, რომელზეც თვალები და პირია გამოჭრილი, შიგნით კი სანთელი დევს.

კოსტიუმი ვისაც არ ჰქონდა ნიღაბი ეკეთა. ძირითადად სპეციალური მოსაწვევებით ხდებოდა შესვლა, თუმცა 15 ლარიანი ბილეთებიც იყიდებოდა. გაყიდული ბილეთებიდან შემოსული თანხა უნდა გადარიცხულიყო საქველმოქმედო ფონდ „აიავნანაში“.

უკრავდა კლუბური მუსიკა, ქუჩაზე მდებარე კაფეები გაივსო, ყველა ერთბოდა და უამრავი ხალხი ირეოდა, თუმცა უეცრად რამდენიმე კაცისგან შემდგარი ჯგუფი შევარდა ერეკლე მეორეს ქუჩაზე, ავარდნენ სცენაზე, სცემეს Dჟ, დაუმტვრიეს აპარატურა. თავდამხსმელებმა ყველა იქ მყოფი სატანისტებად შერაცხეს და ეკლესიის გვერდით არარელიგიურ რიტუალის გამართვაში დაადანაშულეს. მათი მტკიცებით, ისინი საპატრიარქოს წარმომადგენლები იყვნენ. თვითმხილველების თქმით, ამ ჯგუფთან ერთად იყო ანაფორაში ჩაცმული მამაკაცი, რომელიც სცენაზე ავიდა და Dჟ -ს „MIXEღ”-ი დაამტვრია.

„ყველაფერი ძალიან მაგრა[დ] იყო, არაფერი სატანისტური არ ხდებოდა, უბრალოდ ვერთობოდით, მაგრამ უცბად ერთი ამბავი ატყდა, ვერ მივხვდი რა მოხდა”, - თქვა ინცინდენტის ერთ-ერთმა თვითმხილველმა გაგა ბუკიამ. “მერე შემოვარდა რამდენიმე კაცი, ჩემი მეგობარიც ცემეს, მოკლედ ძალიან არეულობა იყო“.

საღამო დაახლოებით 12 საათისთვის დასრულდა, თუმცა დაგეგმილი იყო რომ 2-3 სთ.-მდე გაგრძელდებოდა.

ამ ფაქტთან დაკავშირებით კომენტარის გაკეთება ქალაქ თბილისის მერიის ახალგაზრდულ საქმეთა მონიტორინგის განყოფილების უფროსს- თორნიკე ხუციშვილს ვთხოვეთ. მისი თქმით, „ჰელოუინი“ ამერიკული ტრადიციაა და მსოფლიოს ყველა ქვეყანაში აღინიშნება. ბატონი თორნიკეს აზრით, „ჰელოუინი“ ქართულ ბერიკაობასთან გაიგივებული ტრადიციაა, რადგან ორივე ავი სულების განდევნას ემსახურება. ხუციშვილი მიიჩნევს რომ ამ დღეს განსაკუთრებული არაფერი ხდებოდა, იყო ჩვეულებრივი კოსტიუმირებული კარნავალი და რელიგიასთან არანაირ კავშირში არ იყო, ამიტომაც ვერ ხვდება თუ რამ გამოიწვია ამხელა აგრესია. “ჩვენ არ მიგვაჩნია, რომ ეს დღესასწაული რაიმე კავშირშია რელიგიასთან, ამიტომაც როცა მისი აღნიშვნა გადავწყვიტეთ არ ჩაგვითვლია საჭიროდ, რომ საპატრიარქო საქმის კურსში ჩაგვეყენებინა. ჩვენ იმ ზღვარს არ გადავალთ რაც ეკლესიის რეპუტაციას შელახავს“. - განაცხადა ხუციშვილმა. ის ესაუბრა საპატრიარქოსთან არსებულ ახალგაზრდულ ცენტრს, სადაც უარყვეს, რომ მათი დავალებით ვინმე ყოფილიყო გაგზავნილი ზეიმის ჩასაშლელად. თორნიკე ხუციშვილის აზრით, „სადამსჯელო რაზმი“ არანაირ კავშირში არ იყო საპატრიარქოსთან, ისინი უბრალოდ მის სახელს ეფარებოდნენ.

სამწუხაროდ ვერ დავადგინეთ „ სადამსჯელო რაზმის“ რეალური წარმომავლობა და ვერც ანაფორაში ცაცმული მამაკაცის ვინაობა, შესაბამისად ვერც მათ კომენტარს შემოგთავაზებთ. ხუციშვილის თქმით მერია ამ ამბავში ბოლომდე გარკვევას გეგმავს.

Sunday, November 2, 2008

არაჩვეულებრივი გამოფენა

ქართული სასაფლაო თავისი კოლორიტითა და ექსცენტრულობით განსაკუთრებული ფენომენია, რომელიც ერთდროულად ითავსებს ადამიანურ მწუხარებასა და სიცოცხლის ზეიმს. თუთანა კვარაცხელია არ შეუშინდა სასაფლაოს ბინადრებს, მიცვალებულებსა თუ ცოცხლებს, და ქართული სასაფლაოს თავისებურ პოეზიას ახლოს გაეცნო.

თუთანა კვარაცხელია
თბილისი, 2 ნოემბერი, 2008

ზოგიერთები მიცვალებულებს უფრთხიან, სხვები კი ამტკიცებენ, რომ მკვდრების კი არა ცოცხლების უნდა გვეშინოდეს. თუ თქვენ სულების არსებობის არ გჯერათ და არც ცრურწმენები გაშინებთ, შეგიძლიათ ამ მშვიდ ადგილას იხეტიალოთ და წარსულიდან გზავნილებს გაეცნოთ.


ხშირად ახლობლები მოკლე ეტიპაფის საშუალებით ქვაზე უკვდავჰყოფენ გარდაცვლილთა ხსოვნას:

ზოგს ნაადრევად მოუსწარაფეს სიცოცხლე


















გავრცელებულ სტერეოტიპში, რომ თითქოს ქართველები დროს ფლანგავენ და საათზე დამოკიდებული არ არიან, შეიძლება ძალიან დაეჭვდეთ, რადგან, როგორც ჩანს, ზოგიერთს არსებობის ყოველი წუთი გათვლილი აქვს:

და სიკვდილისთვისაც თადარიგი აქვს დაჭერილი:


















ზოგს ურჩევნია დაუკითხავად არავინ შეაწუხოს სამარადისო სასუფეველში


















ეს ადგილი საქართველოს ეთნიკური მრავალფეროვნების მორიგი დასტურია

ზოგიერთებს სურთ, რომ მათ მიცვალებულებს წმინდანები მფარველობდნენ

Monday, October 27, 2008

თბილისობა რიყეზე


ანა დაბრუნდაშვილი

25-26 ოქტომბერს საქართველოს დედაქალაქმა ტრადიციულად თბილისობის დღესასწაულს უმასპინძლა. ბლოგერი ანა დაბრუნდაშვილი მოზეიმეთა მარაქაში გაერია და მოგვაწოდა ინფორმაცია მოვლენათა ეპიცენტრიდან – რიყედან, სადაც გასულ შაბათ-კვირას თბილისური ჰანგები გაისმა და მაყალზე მწვადები აშიშხინდა.

თბილისის უბნებში დღსასწაულთან დაკავშირებით სხვადასხვა ღონისძიებები ეწყობა. ევროპის მოედანი, ანუ რიყე დილიდანვე ემზადება ორდღიანი ხალხმრავლობისათვის.

დილის 11 საათისთვის რიყე ჯერ ცარიელია. “ჟიგულის” და “ვოლგას” მარკის მანქანებიდან ხალხი კუბოკრულ ჩანთებს ალაგებს. ჩანთებში ჩურჩხელები, მზესუმზირა და ჩირი ჩანს. ზოგმა უკვე მოასწრო გასაყიდი ნივთების დახლზე დალაგება: თექის ნამუშევრები, სვანური ქუდები დოქები, თასები და ხის სხვა ნაკეთობები.

ხალხი უკვე იწყებს მოსვლას და პირველ შთაბეჭდილებებს გამოთქვამს. სწრაფი კვების ობიექტები უკვე ღიაა: “ბურგერვილი”, კაფე “ნატახტარი” და სხვა უფრო პატარა პუნქტები დასახელების გარეშე.
ორგანიზატორებმა საბავშვო გასართობებზეც იზრუნეს. რიყის ტერიტორიაზე პატარა ატრაქციონები, ტირი და სასრიალოა. მსურველებს კლდეზე ცოცვაც შეუძლიათ სცადონ.

უკვე მომრავლებული ახალგაზრდების ნაწილი მოხატული სახით დადის. ზოგი მობილურის ეკრანში იყურება და ცდილობს იქ დაინახოს როგორ გამოიყურება, სხვები ჯერ კიდევ რიგში დგანან. მხატვრების უმრავლესობა სამხატვრო აკადემიის სტუდენტია.

მოწყალებისთვის გამოსული შორიდან ათვალიერებენ ჩურჩხელების გამყიდველებს, ან ჩუმად ფაეტონს ახტებიან, უფასოდ მგზავრობენ .

ტერიტორიას პატრულის თანამშრომლები აკონტროლებენ. თუმცა საპატრულო მანქანა აქ ერთადერთი ტრანსპორტი არაა. სანაპიროს მხარეს ცხენები და ვირები დგანან. აქეთ-იქით ფაეტონები დადიან. “აბა კაი ცხენი”-პატრონი აშკარად აზვიადებს ცხენის შესაძლებლობებს. ერთ ადგილას გაჩერებული ცხენი დაძვრას საერთოდ არ აპირებს, მიუხედავად პატრონის მცდელობისა.

ისმის თანამედროვე ქართული სიმღერები სიყვარულზე, ღამესა და წვიმაზე. ჯერ კიდევ სავარჯიშო ფორმებში გამოწყობილი მოცეკვავეები კონცერტისთვის ემზადებიან. რიყეზე ხალხი მომრავლდა. “თბილისობა” უფრო აქტიურ ფაზაში შედის. მაყალზე მწვადების შეწვაც მთავრდება.
რიყე “თბილისობის” მხოლოდ ერთი ნაწილია. სხვა ღონისძიებების შესახებ მსურველებმა შეიძლება ინტერნეტის საშუალებით გაიგონ.

Thursday, October 23, 2008

,,ბატონების” წინააღმდეგ ვაქცინა წითელი მამლის კვალდაკვა


ნინო გოგუა
თბილისი, 22 ოქტომბერი






,,წითელა თუ წითურა
შეგეყაროს თუ არ გინდა,
აიცერი, რომ არ დაავადდე
ბატონები შენ რად გინდა?”

წითურასა და წითელას საწინააღმდეგო უფასო ვაქცინაცია 20 ოქტომბერს დაიწყო და 2 ნოემბრამდე გაგრძელდება.
აცრისთვის საჭიროა მიხვიდეთ ამბულატორიაში, პოლიკლინიკაში ან სასწავლო დაწესებულებაში, სადაც ექიმი პატარა გამოკითხვას ჩაგიტარებთ და იმ შემთხვევაში გეტყვით უარს ვაქცინის გაკეთებაზე თუ – მაღალი სიცხე გაქვთ, ორსულად ხართ, ალერგიული ხართ ან თუ აქამდე არასდროს აცრილხართ.
თუ თქვენთვის ვაქცინის მიღება სარისკო არაა, მაშინ ექთანი გაყინული კონტეინერიდან ამოიღებს კაფსულას და მხარში ნემსის ჩხვლეტით შეგიყვანთ ხსნარს. გამოყენებულ ბამბას და ერთჯერად ნემსს სპეციალურ კონტეინერში მოათავსებენ.
,,აცრის შემდეგ თავს კარგად ვგრძნობ. ოდნავი დისკომფორტის შეგრძნება მაქვს ნანემსარ ადგილას. თვითონ პროცესით კმაყოფილი ვარ – გულისხმიერი მედპერსონალია და ჰიგიენურადაც ყველაფერი მოწესრიგებულია” – ირაკლი ხვადაგიანი, სტუდენტი.

ვაქცინას მხოლოდ 6-27 წლის ასაკის მსურველებს უკეთებენ. ექიმის განმარტვით ამის მიზეზი ისაა, რომ ძირითადად, ამ ასაკში ვლინდება ,,წითელა” და ,,წითურა”. რაც შეეხება უკუჩვენებას, როგორც შრომის ჯანმთელობისა და სოციალური დაცვის სამინისტროს პრესცენტრი აცხადებს, ამ პრეპარატით მსოფლიოში 34 მილიონი ადამიანია აცრილი და გართულების მასიური შემთხვევები არც ერთ ქვეყანაში არ ყოფილა. მომჩივარი სტუდენტი არც თსუ-ს ,,ოჯახის ექიმის” კაბინეტში მისულა, მიუხედავად იმისა, რომ რამდენიმე მცირეწლოვანს უკუჩვენებები აღმოაჩნდა ვაქცინის მიღების შემდეგ.

ამ მონაცემებით შეგულიანებულმა, გადავწყვიტე, თავადაც გამეკეთებინა აცრა. პროცესი მართლაც უმტკივნეული აღმოჩნდა, მაგრამ საღამოს 37° სიცხე მიჩვენა თერმომეტრმა, რაც შეიძლება, ვაქცინის ბრალი სულაც არაა – მთელი დღე წვიმაში მომიწია სიარული. როგორც ,,ოჯახის ექიმმა” ია ჩხარტიშვილმა განმიმარტა: ,,ნებისმიერი სახის ვაქცინას, ისევე როგორც ნებისმიერ წამალს, შეიძლება აღმოაჩნდეს რაიმე სახის მსუბუქი უკუჩვენება. ასეთი შემთხვევევები იშვიათია წითურას და წითელას საწინააღმდეგო ვაქცინაციის დროს”.
წითურასა და წითელას საწინააღმდეგო კამპანია მთელს მსოფლიოში მიმდინარეობს, რაც, როგორც UNICEF-ის ოფიციალური საიტი იუწყება (http://www.unicef.org/), 2010 წლისთვის ამ ინფექციების რაოდენობის შემცირებას ისახავს მიზნად; UNICEF და მიმდინარე ვაქცინაციის ორგანიზატორი და დონორი ორგანიზაციები (WORLD HEALTH ORGANIZATION, Rospropovich – Vishnevskaya Foundation, USDA) მსგავსი პროგრამების ფარგლებში გრძელვადიან ურთეირთობას გეგმავენ საქართველოსთან.


პ.ს. თუ კიდევ ერთი ახალი სტატია არ დავდე, ესეიგი სიცხემ დამიწია და შეგიძლიათ თამამად აიცრათ:)

Wednesday, October 22, 2008

შტოკჰაუზენის ღმერთის ძიება გოეთეს ინსტიტუტში

ნათია გულიაშვილი,
22 ოქტომბერი, 2008 წელი

16-დან 31-ოტომბრამდე თბილისში თანამედროვე მუსიკის საღამოები იმართება. პროექტის ფარგლებში 19 ოქტომბერს გოეთეს სახელობის ინსტიტუტში შეკრებილი საზოგადოება XX საუკუნის ცნობილი კომპოზიტორის, კარლჰაინც შტოკჰაუზენის შემოქმედებას გაეცნო.


...სცენაზე ევას დიდი ქანდაკება დგას. ეს საოპერო ციკლის, “ნათელისერთერთი ნაწილია – “ორშაბათი” (ციკლი კვირის შვიდ დღეს მოიცავს და ალეგორიულად სამყაროს შექმნას გამოხატავს). ევა-სიმბოლურად სიცოცხლის საწყისია. მისი სხეულიდან გამოდიან (იბადებიან) მუსიკოსები და ქანდაკებაზე მიდგმულ კიბეზე მოძრაობენ...


სცენის მიღმა კი, სტუდიაში თავად კომპოზიტორი უზარმაზარ მიქშერთან ზის, რომელსაც ყველა ინსტრუმენტი უერთდება. ის თავად არეგულირებს ხმებს...

ეს ზემოთქმული დოკუმენტური ფილმის სახით აჩვენეს გოეთეს ინსტიტუტში.

შტოკჰაუზენმა, ერთი მხრივ, უმნიშვნელოვანესი გარდატეხა მოახდინა კლასიკური მუსიკის განვითარებაში, გამოიყენა რა პირველმა ელექტრონული ჟღერადობა, მუსიკის თეორიაში შემოიტანა საკუთარი ჰიპოთეზები და აკუსტიკურ ინსტრუმენტებს (ძირითადად ფორტეპიანოს) ახალი ჟღერადობა შესძინა. მეორე მხრივ კი, მასზე, როგორც ექსპერიმენტატორ კომპოზიტორზე, კრიტიკოსთა ნაწილს საკმაოდ სკეპტიკური დამოკიდებულება აქვს.

საღამოს მეორე ნაწილი სწორედ შტოკჰაუზენის საფორტეპიანო შემოქმედებას დაეთმო. პიანისტმა ნინო ჟვანიამ, რომელიც თავად იცნობდა კომპოზიტორს და ისმენდა მისი ლექციების კურსს, კონცერტის დაწყებამდე მსმენელს რამდენიმე ძირითადი მომენტი გააცნო შტოკჰაუზენის შემოქმედებიდან.


პიანისტმა კომპოზიტორის "კლავირშტუკების" ციკლიდან 2 ნაწარმოები შეასრულა. აღსანიშნავია, რომ შტოკჰაუზენი, რომელიც ბგერითი გამოსახვის ახალ ფორმებს ეძებდა, სპეციფიკური სანოტო ჩანაწერებს აკეთებდა და მისსწორადწაკითხვას შესაბამისი მომზადება სჭირდება.

ნაწარმოებებს შორის ჟღერდა შტოკჰაუზენის ელექტრონული კომპოზიცია ყრმების სიმღერა”, რომლის საფუძველს წარმოადგენს ადამიანის ხმების იმიტაცია ელექტრონული საშუალებებით. კომპოზიციაში ალაგ-ალაგგამღერებულიასიტყვები ან ცალკეული მარცვლები ბავშვთა გალობიდან. ამას ემატება მეორე მნიშვნელოვანი ელემენტისივრცის ეფექტი. ბგერების და მათი ექოს მოძრაობა სივრცეში აღიქმება მუსიკის ახალ განზომილებად. რაც სტერეო ეფექტის საშუალებით მიიღწევა (ამ ეფექტს ოთახის ოთხივე კუთხეში დამონტაჟებული დინამიკები ქმნიდა). ფირზე ჩაწერილი ბგერის მოძრაობის მიმართულების ცვლა, მისიხეტიალიგანსაკუთრებულ აკუსტიკური გამოცოცხლების მიზანს ემსახურება.

სივრცის, როგორც ახალი მუსიკალური განზომილების მთლიანად ათვისება, შტოკჰაუზენის ერთერთი ნოვაციაა. როგორც თავად ამბობდა: საბოლოო ჯამში მე ყველაფერი მინდა. დიახ, სწორედ ამაში მდგომარეობს ღვთის შეცნობა.”